Wasan gasar Zakarun Turai na maraicen Talata tsakanin Real Madrid da Benfica ya bar baya da ƙura, inda zuwa yanzu hukumar ƙwallon ƙafa ta Turai, UEFA ta tabbatar da cewa ta fara gudanar da bincike kan lamarin da ya faru a wasan.

Yayin wasan na cike gurbi a gasar Zakarun Turai, tauraron ɗanwasan Madrid, Vinicius Jr ya yi ƙorafin cewa ɗanwasan gaban Benfica, Gianluca Prestianni ya masa zagin launin fata.

A yanzu dai tuni hukumar UEFA, ta sanar da cewa ta miƙa wa kwamitinta na ladabi da ladabtarwa ya duba lamarin da ya faru a filin wasa na Estadio da Luz, inda Madrid ta doke Benfica da ci 1-0.

Lamarin ya auku ne jim-kaɗan bayan Vinicius Jr ya zura ƙwallo, kuma bayan faruwar lamarin an kwashe mituna 10 ana cecekuce, inda tarin ‘yanwasa suka yi sa-in-sa da alƙalin wasa.

Bayan cin ƙwallo, an ga Vinicius ya ruga wajen alƙali yana mai zargin Prestianni da faɗa masa kalaman zagin launin fata. Alƙali, Francois Letexier, ya ɗauki matakin da dokar UEFA ta tanada game da lamarin wariya.

Musanta zargi

An kuma ga ɗanwasan Real Madrid, Kylian Mbappe yana jan ragamar masu neman a ƙauracewa wasan matuƙar ba a ɗauki mataki ba.

Mbappe ya bayyana abin da ya gani a wasan, “Ɗanwasa mai lamba 25… ya ja wuyan rigarsa [don rufe bakinsa] kuma ya ce Vini biri ne sau biyar. Na ji hakan. Akwai ‘ƴanwasan Benfica ma da suka ji”.

A Laraban nan ne hukumar UEFA ta fitar da sanarwa mai cewa, "An naɗa mai saka-ido kan ladabi da ladabtarwa don ya binciki zarge-zargen halayyar wariya yayin wasan Zakarun Turai na UEFA Champions, kakar 2025/2026 tsakanin Benfica da Real Madrid CF ranar 17 ga Fabrairun 2026.

Sai dai gabanin wannan sanarwa Prestianni mai shekaru 19 ya wallafa saƙo a shafinsa na soshiyar midiya yana kausasa musanta zarge-zargen, yana iƙirarin cewa jami’an Real Madrid sun sauya zancen. Ya jaddada cewa an samu saɓanin harshe ne yayin cecekucensa a wasan.