Tirada dadka ku dhintay fatahaado xooggan oo ka dhacay Kenya ayaa gaartay 42 ruux tan iyo Jimcihii kadib markii roobab culus ay sababeen fatahaado degdeg ah oo ka dhacay gobollo dhowr ah, sida ay Axaddii sheegeen booliiska dalkaasi.

Mas’uuliyiinta ayaa sheegay in 26 ka mid ah dhimashada laga diiwaangeliyay caasimadda Nairobi, halkaas oo biyaha fatahaaddu ay ku qulquleen xaafado dhulka ka hooseeya iyo deegaamaysi aan qorshaysnayn, iyadoo biyuhu ay galeen guryaha isla markaana qaadeen gaadiid kadib markii webiyadu ay ku fataheen.

Kooxaha gurmadka degdegga ah ayaa sii wada howlaha baadi-goobka iyo samatabbixinta ee ka socda qaybo badan oo magaalada ah iyo deegaannada ku xeeran.

Booliisku waxay sheegeen in dhimashooyin laga soo wariyay degmooyin kala duwan kadib markii roobab mahiigaan ah ay ku dhufteen qaybo badan oo dalka ah dhammaadkii toddobaadka, taasoo xirtay waddooyin isla markaana carqaladaysay gaadiidka iyo hawlaha maalinlaha ah ee magaalooyin dhowr ah.

Dowladda oo bixin doonta kharashaadka isbitaalka ee dhibbanayaasha

Wasiirka Adeegga Dadweynaha iyo Barnaamijyada Gaarka ah Geoffrey Ruku ayaa xaqiijiyay tirada dhimashada isagoo Axaddii la hadlayay warbaahinta, wuxuuna sheegay in dowladda ay dirtay kooxo gurmad degdeg ah si ay u caawiyaan bulshooyinka ay saameeyeen.

Ruku ayaa sidoo kale ku dhawaaqay in dowladdu ay bixin doonto kharashaadka isbitaalka ee dadka ku waxyeelloobay fatahaadaha iyo kharashaadka aaska ee qoysaska musiibadan ku waayay ehelkooda.

Mas’uuliyiintu waxay sheegeen in taageeradani ay ujeeddadeedu tahay in la yareeyo culayska ku soo kordhay qoysaska ay musiibadu saameysay.

Biyaha ka dhashay fatahaadda ayaa sababay burbur ballaaran oo soo gaaray guryaha, goobaha ganacsiga iyo kaabayaal ku yaal qaybo ka mid ah Nairobi iyo gobollo kale, halka kooxaha samatabbixintu ay sii wadaan daad-gureynta dadka deggan meelaha ay biyuhu qarqiyeen.