Nigerian goment don come out talk say nobody dey cheat for how dem dey share di new smart meters for light wey dem just buy.

Di matter come up for one meeting wey Bureau of Public Enterprise (BPE) organize. Na di DG for BPE, Ayodeji Ariyo Gbeleyi, talk for inside meeting wey NERC, TCN, and all di DisCos from across Nigeria join. E talk say dem need di meeting to explain di real tins about di new meters because plenty people dey confuse.

Di project na part of one $500 million plan wey World Bank support, wey dem dey call DISREP. Di main aim be to help DisCos work better and make more money by making sure say dem give customers correct meter.

Goment talk say right now, about 5.3 million houses never get meter. Dem say if dem give people meter, e go help reduce how DisCos dey lose money, make dem get more revenue, and serve customers better.

Dem also swear say di process to get di meter go clear, and dem go tell citizens everything. Dem promise say everybody wey need meter go get am, and nobody go deny dem. Dis one dey come after plenty people complain say even after dem pay money (both official and "kola" money), light officials still no give dem meter.