Daga Firmain Eric Mbadinga da Franck Noudofinin a Ségou.
Bikin Ségou ɗaya ne cikin mafi girman bukukuwan al'adu a Mali, yana gudana a karo na 21 a bakin Kogin Niger, don karrama al'adun kaɗe-kaɗe da fasahohi na Afirka.
Masu sha'awar zane-zane da masoya al'adun Afirka sun hallara a garin Ségou, a kudu maso tsakiyar Mali don bikin na tsawon kwanaki biyar, wanda aka fara ranar Litinin.
Garin yana da mazauna 150,000, kuma an ƙawata shi. Wurin bikin ya sha ado da kaloli masu jan hankali, don birge baƙi da 'yan kallo da maziyarta.
A duk faɗin garin, an yi wa gidaje fenti an kuma rubuta saƙonnin maraba cikin harsunan gida da kuma Faransanci.
Wani saƙon Faransancin na cewa “Ségou Art 2025. Semaine de l'africanité de l'AES”.
Taken bikin na wannan shekarar shi ne "Yalwar al'adu, zaman lafiya da haɗin-kai".
Yana gudana ne da haɗin gwiwar Semaine de la fraternité (Brotherhood Week) wanda ƙungiyar Alliance of Sahel States (AES) ta shirya.
Bikin wannan shekarar ya gayyato mawaƙa, masu ƙere-ƙere, masu zane, masu sassaƙa, da masu alkinta ayyukan fasaha daga Burkina Faso, Nijar, Mali da sauran ƙasashen Afirka.
Za su yi bikin ɗaukaka al'adun Afirka mabambanta ta hanyar fasaha don ƙarfafa danƙon zaman lafiya haɗn-kai da yake riƙe al'ummomi a yankin Sahel tsawon ƙarnoni.
A ranar farko ta bikin a yi rawar matum-mutumi ana kaɗa ganga a layukan Rue El Hadj Oumar Tall, wata gunduma da a nan ne hedikwatar Festival sur le Niger Foundation take.
Yacouba Magassouba wani mamba ne na kamfanin Nama daga Mali. Mai shekaru 30, ya ce yana alfahari da haɓaka al'adun ƙasarsa a gida.
Yana cike da gamsuwa da yadda bukin yake gudana ranar Litinin.
“Aikinmu shi ne mu sarrafa waɗannan manya-manyan mutum-mutumin. Kafin bikin ya fara, mun yi kamfe don gayyato mutane,” in ji Yacouba da yake magana da TRT Afrika.
Wata 'yar rawa Kadidja Tiemanta daga Burkina Faso tana fatan cewa yunƙurin wayar da kai na Yacouba da sauran masu shirya bikin zai janyo hankalin mutane da dama zuwa halartar bikin.
Tana da shirin taka rawa na zaratan 'yan rawa wanda ita kaɗai ta san su.
Shi ma Yacouba yana da fatan cewa bikin zai samar da kyakkyawar alaƙar mutane da bikin.
Ta faɗa wa TRT Afrika cewa, “Ganin cewa wannan shekara an saka al'adu a batun wannan bikin, ina fatan hakan zai yi tasiri gare mu”.
Djibril Guissé, Babban Jakadan Bikin Ségou'Art - da kuma hukumomin Mali suna fatan karɓar baƙuncin dubban maziyarta a bikin wannan shekarar.
Maziyarta suna da zaɓin su nemi kalar abincin da suke so, kamar as Mafé du Mali ko su sha shayi a tantin Buzaye.
Baya ga waɗannan, mahalarta bikin za su shiga taron maƙaloli da aka shirya kamar kan batun ‘gina haɗaɗɗiyar ƙasar Sahel: damarmaki da ƙalubale’.
Ga masoya kaɗe-kaɗe, sun riga sun ga yadda mawaƙa kamar su Mamar Kassey daga Nijar, Salif Keita daga Mali, Alif Naaba daga Burkina Faso da Lamine Diabaté daga Guinea, masu salo ƙida kala-kala irin na balafon, ganga, da Kora.
An ƙirƙiri Ségou'Art - a 2004 don nun mawaƙan Mali, sannan a wannan shekarar an haɗa shi da lamuran ƙawancen makon AES don amfanar da al'uammar mawaƙa, masu sassaƙa, da sauran ƙwararru da ke nuna tsantsar Afirka.
