Mgombea wa Chama cha Democratic, Abdul El-Sayed, ameweka historia ya kuwa Muislamu wa kwanza kuchaguliwa kuwa mbunge wa Seneti ya Marekani, baada ya kumshinda aliyekuwa Seneta wa Chama cha Republican, Mike Rogers, katika uchaguzi uliofuatiliwa kwa karibu katika jimbo la Michigan siku ya Jumanne.
Ushindi wake umekuja baada ya kampeni iliyokuwa na mijadala na mvutano mkubwa, huku imani yake ya Kiislamu ikiwa moja ya masuala yaliyopewa uzito mkubwa. Rais Donald Trump pamoja na wanasiasa wengine wa Republican walimshambulia mara kadhaa kwa misingi ya kidini.
Hata hivyo, El-Sayed alikanusha vikali tuhuma zilizokuwa zikijaribu kumhusisha na misimamo mikali ya itikadi kali.
El-Sayed, mwenye asili ya Misri, ni daktari na aliwahi kufanya kazi katika sekta ya afya ya umma, alipata nafasi ya kugombea kiti hicho baada ya kushinda katika mchuano mkali wa kura za maoni ndani ya chama chake. Alikuwa akigombea nafasi iliyoachwa wazi na Seneta Gary Peters, ambaye alitangaza kustaafu.
El-Sayed alisherehekea ushindi wake uliokuwa umetabiriwa mapema Jumatano, kwa kutoa hotuba yenye hisia kali mbele ya wafuasi wake, huku akiwakosoa moja kwa moja Trump na Makamu wa Rais JD Vance.
Akizungumza katika hafla ya kufuatilia matokeo ya uchaguzi, El-Sayed aliwashukuru wapiga kura wa Michigan na kuahidi kufanya kazi katika Seneti kwa moyo wa kujitolea, uwazi, msimamo thabiti na huruma, ambao alisema wananchi walikuwa wameuonyesha wakati wote wa kampeni yake.
“Wananchi wa Michigan, nina hamu kubwa ya kuwatumikia kwa moyo wa ukarimu, mtazamo mpana, uthabiti na dhati ileile mliyonionyesha,” aliwaambia wafuasi wake.
Aliwataka wafuasi wake kuuchukulia ushindi huo kama mafanikio ya pamoja, akisisitiza kuwa matokeo hayo yalikuwa ishara ya kuwakataa wapinzani wake wa kisiasa na ushindi wa wote waliokuwa wakipigania mabadiliko makubwa zaidi katika siasa za Marekani.
