Mawaziri wa Mambo ya Nje wa Uturuki, Misri, Pakistan na Saudi Arabia wamekutana jijini Istanbul kwa mkutano wa kundi la R4 unaolenga kuimarisha mazungumzo ya kikanda na kuunga mkono juhudi za kufanikisha utulivu wa kudumu.

Mkutano huo, uliofunguliwa siku ya Ijumaa, unaongozwa na Waziri wa Mambo ya Nje wa Uturuki, Hakan Fidan.

Nchi hizo nne zilianzisha mfumo wa ushirikiano wa R4 kwa kuzingatia kanuni ya nchi za eneo husika kumiliki na kuongoza juhudi za kutatua changamoto zao, kwa lengo la kuimarisha ushirikiano katika masuala ya kikanda.

Fidan anatarajiwa kusisitiza kuwa nchi za eneo hilo zinapaswa kuwa na nafasi kubwa katika kuhakikisha usalama wao wenyewe. Pia anatarajiwa kueleza dhamira ya Uturuki ya kuimarisha mifumo ya ushirikiano inayojengwa kwa kuzingatia msingi huo.

Aidha, anatarajiwa kusisitiza kuwa migogoro iliyopo haipaswi kuruhusiwa kuenea zaidi, mapigano hayapaswi kuenea katika maeneo mapya, na mivutano ya kikanda haipaswi kusababisha ukosefu mkubwa zaidi wa utulivu.

Diplomasia na usalama wa kikanda

Fidan anatarajiwa kusisitiza kuwa kuendelea kwa Israel kuyakalia maeneo ya Palestina, msimamo wake usioonyesha utayari wa kufanya maridhiano unaodhoofisha juhudi za kimataifa za kuleta amani, pamoja na hatua zake za kijeshi katika maeneo mbalimbali ya ukanda huo, ni miongoni mwa sababu kuu za mivutano Mashariki ya Kati.

Kuhusu mzozo kati ya Marekani na Iran, anatarajiwa kusisitiza kuwa diplomasia na mazungumzo ndiyo njia pekee ya kufikia suluhu ya kudumu. Anatarajiwa pia kuonya kuwa hatua za kijeshi huzidisha udhaifu wa kiusalama katika eneo hilo na kuongeza hatari ya kuzuka kwa mzozo mpana zaidi.

Kufuatia mashambulizi ya hivi karibuni yaliyofanywa na wapiganaji wa kundi la Houthi dhidi ya raia na miundombinu ya kiraia nchini Saudi Arabia, Fidan anatarajiwa kuthibitisha tena uungaji mkono wa Uturuki katika kulinda usalama wa nchi hiyo.

Vilevile, anatarajiwa kuangazia mshikamano na dhana ya usalama wa pamoja inayozingatiwa na Muungano wa Ulinzi wa Makkah, ulioanzishwa mwezi Agosti, unaojumuisha Uturuki, Saudi Arabia na Pakistan.