Presidency don clear di matter say di Freedom of Information Act, FOIA, case wey dey involve President Bola Tinubu for one United States federal court na civil case about records wey dem no release, and no be criminal case against di President.

Dem talk: "Make e clear, di matter na civil case about records wey dem no release under United States Freedom of Information Act. E no be criminal case against President Tinubu, and di court never find am guilty of any criminal offence."

Di Presidency for one statement by di Special Adviser to di President on Information and Strategy, Bayo Onanuga, talk say di matter come up 23 years afta di American Consulate for Lagos, for one letter wey dem write on February 4, 2003, tell di then Inspector-General of Police, Mr. Tafa Balogun, say Federal Bureau of Investigation, FBI, records check show say no criminal arrest records, wants or warrants dey for then-Governor Bola Tinubu.

According to di statement: "For 2022, Mr. Aaron Greenspan, one person wey dem know dey work with Nigerian opposition figures including David Hundeyin and Atiku Abubakar, submit FOIA requests to plenty United States government agencies to ask for records wey concern President Tinubu.

"Afta di agencies hold some records back or refuse to say weda dem exist or not, Mr. Greenspan start Civil Action No. 23-1816 before di United States District Court for di District of Columbia for 2023.

"Di court later allow President Tinubu to join di case as one intervenor.

"During di case, di defendants use di 'Glomar defence,' one standard defence wey US law enforcement agencies dey use from time to time. E simply mean say di government agency no fit 'deny or admit' weda investigation dey exist.

"E dey protect government workers and di methods and sources wey law enforcement agencies dey use to investigate and prosecute crimes.

"Based on dis defence, di US District Court grant summary judgment in favour of CIA, EOUSA, Department of State, Department of di Treasury and Internal Revenue Service, IRS.

"Di court rule say dem remove from di case, leaving aspects of di claims wey involve FBI and Drug Enforcement Administration for more consideration."