Gwamnatin Nijar ta karɓi tankokin dakon man fetur 53 da suka fito daga ƙasar Aljeriya, a wani mataki na ƙoƙarin magance matsalar ƙarancin man fetur da dizal da ƙasar ke fuskanta.
Ministan Man Fetur na Nijar, M. Hamadou Tini, ne ya karɓi tankokin a ranar Lahadi, 1 ga watan Nuwamba, a birnin Agadez, tare da jakadan Aljeriya a Nijar da Darakta Janar na kamfanin mai na SONIDEP. Gwamnan yankin Agadez, Janar Boulama Issa Ibra, da sauran jami'an gwamnati ne suka tarbe su.
A cewar sanarwar gwamnatin, tankokin 53 ɗin na ɗauke da nau'ikan kayayyakin man fetur daban-daban, waɗanda kamfanin SONIDEP ya nema daga Aljeriya.
Nijar ta yi godiya ga shugaban Aljeriya, Abdelmadjid Tebboune, da gwamnatinsa bisa taimakawa wajen sauƙaƙa, gaggauta da kuma tabbatar da jigilar man zuwa ƙasar.
Da yake magana kan matsalar ƙarancin mai, ministan ya ce kasancewar ƙasa na da arzikin ɗanyen mai ba yana nufin za ta iya wadatar da kanta da tataccen man fetur ba, domin hakan na buƙatar ingantattun matakai na tacewa, sufuri, ajiya da rarrabawa.
Ya kuma bayyana cewa matsalar da ake fuskanta na da alaƙa da rikicin makamashi na duniya, sakamakon yaƙe-yaƙe, tangarɗar hanyoyin jigilar kayayyaki da sauye-sauyen farashin mai.
Gwamnatin Nijar ta ce ta kafa kwamiti na musamman ƙarƙashin kulawar Firaminista domin tunkarar matsalar, tare da wani kwamitin fasaha da aka kafa ta hanyar doka a ranar 12 ga Oktoban 2026.
Manufar hukumomin ƙasar, a cewarta, ita ce wuce matakin magance matsalar cikin gaggawa, zuwa samar da ingantaccen tsarin sa ido, hasashe kan buƙatar fetur da kula da samar da man fetur domin Nijar ta samu damar biyan buƙatun jama'arta da ƙarfinta na cikin gida.
