Attajirin ɗan kasuwar Najeriya, Aliko Dangote ya ƙaddamar da wani aikin wajen ajiyar man fetur da gina bututun jigilar mai mai darajar dala biliyan 2.5 a birnin Walvis Bay na ƙasar Namibia a ranar Laraba.
Ana sa ran aikin zai sauya tsarin samar da man fetur da rarraba shi a ƙasashen Kudancin Afirka.
Aikin na cikin jerin manyan ayyukan makamashi da Dangote, wanda shi ne attajirin da ya fi kowa kuɗi a Afirka, ke jagoranta yayin da yake faɗaɗa harkokin kasuwancinsa a nahiyar da ta dogara sosai da shigo da man fetur daga ƙasashen waje, musamman a daidai lokacin da yaƙin Iran ya ƙara jefa kasuwannin makamashi cikin matsin lamba.
A halin yanzu, Dangote ya mallaki matatar man fetur mafi girma a Afirka, wadda ke Najeriya, mai ƙarfin tace ganga 700,000 a kullum. Yana kuma faɗaɗa ta, tare da shirin gina wata matatar mai mai irin wannan ƙarfin a Kenya, a ɗaya ɓangaren nahiyar.
A wajen bikin ƙaddamar da aikin, wanda Shugabar Namibia, Netumbo Nandi-Ndaitwah, ta halarta, Dangote ya ce da zarar an kammala aikin bututun jigilar mai, zai ƙarfafa 'yancin kai wajen samar da makamashi ga ƙasashen Afirka shida, tare da mayar da Walvis Bay cibiyar jigilar da rarraba man fetur.
Za a kammala aikin cikin watanni 20
Dangote ya ce aikin zai taimaka wajen rage matsalolin sufuri da tsadar jigilar man fetur, da kuma matsalar ƙarancin makamashi da Namibia ke fuskanta, tare da bunƙasa kayayyakin more rayuwa da wuraren ajiyar mai.
Wurin ajiyar man zai kasance da ƙarfin adana kusan lita miliyan 600, kwatankwacin ganga miliyan huɗu na mai. Daga ciki, lita miliyan 360 za su kasance na dizal, yayin da sauran za su kasance na fetur.
Dangote ya shaida wa manema labarai cewa ana sa ran kammala aikin cikin watanni 18 zuwa 20.
Wurin ajiyar man zai kasance da ƙarfin da ya ninka na wurin ajiyar man fetur na ƙasar Namibia na National Oil Storage Facility sau takwas, wanda ke da ƙarfin adana lita miliyan 75, kuma kamfanin mai na ƙasar, Namcor, ke gudanarwa.
Sabbin hanyoyin rarraba man fetur a Afirka
Dangote ya ce aikin zai kuma ƙunshi yiwuwar gina bututun jigilar mai mai tsawon kilomita 1,700, wanda zai haɗa Namibia da ƙasashen Botswana da Zimbabwe da Zambia, da kuma Jamhuriyar Dimokuraɗiyyar Kongo.
Babban masanin tattalin arziki a Oxford Economics Africa, Gerrit van Rooyen, ya ce aikin wani ɓangare ne na babbar dabarar Dangote ta samar da hanyoyin rarraba man fetur a faɗin Afirka domin sauƙaƙa fitar da man da matatar tasa ke tacewa zuwa ƙasashen nahiyar.
Ya ƙara da cewa hakan zai taimaka wa kamfanin wajen faɗaɗa kasuwanninsa, musamman ta hanyar rage dogaro da kasuwannin Turai da Gabashin Asiya, inda ake sa ran sauyin duniya zuwa amfani da makamashi mai tsafta zai rage buƙatar man fetur da aka tace a dogon lokaci.
