Firaministan Isra’ila, Benjamin Netanyahu, ya bayar da umarnin rufe birnin Hebron nan take, tare da umartar jami’an tsaro su shirya kulle yankin Yammacin Kogin Jordan da Isra’ila ta mamaye baki ɗaya.
Matakin ya biyo bayan wani harin harbi da ya jikkata Yahudawan da suka yi ƙaura zuwa matsugunan da ba bisa ƙa’ida ba guda biyar, da kuma kashe Falasɗinawa biyu da sojojin Isra’ila suka yi kusa da garin Halhul, a gundumar Hebron da ke kudancin Yammacin Kogin Jordan.
Netanyahu ya ce ya umarci sojojin Isra’ila da hukumomin tsaro da su rufe Hebron nan take, tare da shirya kulle dukkan yankin Yammacin Kogin Jordan tun daga ranar Jumma’a.
Ya bayyana hakan ne bayan gudanar da wani taron tantance yanayin tsaro tare da manyan jami’an tsaro da na tsaron ƙasa, ciki har da babban hafsan sojin Isra’ila da shugabannin hukumar tsaron cikin gida ta Shin Bet da Majalisar Tsaron Ƙasa.
Gidan talabijin na Isra’ila na KAN ya ruwaito cewa babban hafsan sojin, Eyal Zamir, ya amince da kafa shingen tsaro a Hebron da ƙauyukan da ke kewaye da ita bayan harin harbin.
Shaidun gani da ido sun shaida wa kamfanin dillancin labarai na Anadolu cewa sojojin Isra’ila sun rufe dukkan hanyoyin shiga Hebron da ƙofofin ƙarfe, lamarin da ya mayar da birnin tamkar wanda aka killace.
Sojojin Isra’ila sun kuma toshe hanyoyin shiga garuruwa da unguwannin zama da tuddai na ƙasa da shingayen binciken soji, lamarin da ya hana zirga-zirga tsakanin al’ummomin yankin.
Shaidun sun ƙara da cewa sojojin sun kai samame a wajen Hebron da wasu garuruwan da ke kusa, inda suka binciki shaguna tare da kwace hotunan da kyamarorin tsaro suka ɗauka.
Waɗannan matakai na zuwa ne gabanin zaɓen ‘yan majalisar dokokin Isra’ila da aka shirya gudanarwa a ranar 27 ga Oktoba.
Tun bayan fara yaƙin Isra’ila a Gaza a watan Oktoban 2023, hare-haren sojin Isra’ila da ta’addancin matsugunan Yahudawa a Yammacin Kogin Jordan, ciki har da Gabashin Kudus da aka mamaye, sun ƙaru.
Hare-haren sun haɗa da kashewa da kama Falasɗinawa, rusa gidaje da wasu gine-gine, ƙona masallatai da motoci, lalata gonaki, hana manoma isa filayensu da kuma tilasta wa al’ummomin Falasɗinawa barin muhallansu, yayin da ake ci gaba da faɗaɗa matsugunan Yahudawa da ba bisa ƙa’ida ba.
