An kammala aikin da aka yi wa Fafaroma Leo XIV na cire masa wani tsiro a huhu, in ji Fadar Batikan, wadda ta ƙara da cewa aikin ya tabbatar da cewa yana da kansar huhu.
Daga farko, Fadar Batikan ta bayyana a wata sanarwa cewa aikin da aka yi wa Fafaroma an "yi nasarar kammala shi, a kan lokaci kamar yadda aka tsara," kuma Fafaroman ya koma ɗakinsa.
An gano tsiron ne yayin wani bincike da aka saba kuma ya kasance a wuri guda ne kuma a farko-farkonsa, in ji Fadar Batikan, yayin aiki a Gemelli na Roma.
Tawagar likitocin masu aikin ta sami jagorancin Stefano Margaritora, shugaban ɓangaren asibitin da ke kula da ƙirji da maƙogoro.
Daga baya Fadar Batikan ta ce an sami Fafaroman, mai shekara 71 da kansar huhu.
"An yi wani gwaji na tsakanin ma’aikata da ya tabbatar da kansar ta huhu [lung adenocarcinoma], kamar yadda aka zata daga gwaje-gwajen da aka yi kafin aikin," kamar yadda kafar Vatican News ta ruwaito, tana mai ambato likitoci.
Babu matsaloli masu sarƙaƙiya
Kansar huhu nau’in lung adenocarcinoma an san ta da kasancewa kansar da ta fi yawa ta tantanin hallitar da ba ƙanana ba (NSCLC), wadda ita ce kimanin kashi 40 cikin 100 na dukkan kansar huhu.
Fafaroman ya kasance cikin ɗakin tiyata ne na tsawon sa’o’i uku, yayin da aka shafe mintuna 90 ana aikin kansa.
"Likitocin sun ce an yi nasarar aiki kuma babu wasu matsaloli masu sarƙaƙiya," in ji rahoton.
Ana gano kimanin 1 daga cikin 5 na kansar huhu ne a jikin mutanen da ba su da tarihin shan sigari.
Ababen da ke haddasa kansar huhun a cikin waɗanda ba sa shan sigari sun haɗa da dalilai na halitta da yawan shaƙar iskar gas da kuma sauran haɗɗura na aiki da muhalli. Sai dai babu wani dalili da aka gano a kamuwar Fafaroma da kansar.
